CYNLLUNIO

Arweiniad pellach i’r strategaeth:

Mae strategaeth Ditectif Siarad yn ddull diddorol o asesu cyfoedion a gwerthuso gwaith trafod neu berfformiadau. Mae hi hefyd yn atgyfnerthu dealltwriaeth dysgwyr o drafodaeth effeithiol.

Bydd yr athro yn penderfynu ar feini prawf llafar addas (o’r fframwaith llafaredd) ac yn paratoi taflenni arsylwi ar gyfer y ditectifs. Bydd pob aelod o’r grŵp yn canolbwyntio ar faen prawf llafar penodol neu mae’n bosib i rai grwpiau o ddysgwyr sylwi ar yr holl feini prawf. Y ditectifs sydd yn arsylwi eraill yn siarad a byddan nhw’n llenwi’r daflen arsylwi, yn cofnodi’r hyn maent yn eu clywed. Bydd disgwyl i’r ditectifs rannu adborth gyda’r grŵp/dosbarth ar ddiwedd y dasg. Rhaid i arsylwadau a sylwadau fod yn gadarnhaol ac adeiladol.