CYNLLUNIO

Arweiniad pellach i’r strategaeth:

Gofynnir i’r dysgwyr ddewis ble maen nhw’n teimlo maen nhw’n gweld eu hunain ar ‘lwybr barn’. Mae’r llwybr yn mynd o un pwynt i bwynt arall neu o un gosodiad i osodiad arall (e.e. ‘llwybr’ neu linell o ‘Cytunaf yn gryf. . .’ i ‘Anghytunaf yn chwyrn’) Mae’r dysgwyr yn nodi ar ba pwynt ar y ‘llwybr’ neu’r llinell hon maen nhw’n gweld eu hunain gan roi rhesymau.

Mae sawl ffordd o gynrychioli’r Llwybr Barn yn y dosbarth:

• saeth dau ben ar daflen waith neu fwrdd gwyn.
• darn hir o linyn ar hyd y llawr neu uwch y pen
• dau ddarn o bapur ar waliau cyferbyn, un gyda ‘Cytuno’n gryf’ a’r llall gyda ‘Anghytuno’n gryf’ arnynt.

Bydd yr athro’n rhoi gosodiad i’r disgyblion ac mae angen iddyn nhw ddewis lle ar y Llwybr Barn sy’n cynrychioli eu teimladau. Mae angen trafod y rhesymau pam maen nhw wedi dewis y safle, gall hyn arwain at ddadl rhwng unigolion. Gellir ychwanegu ail a thrydydd datganiad ac ail adrodd y broses. Rhydd hyn y cyfle i’r athro a’r disgyblion brofi amrediad eang o ddatganiadau yn ymwneud â’r pwnc.